قانون السلطة القضائية

استقلال القضاء هو الخطوة الاولى من اجل انتخابات نزيهة و شفافة , يطالب القضاة بمزيد من الاستقلالية عن السلطة التنفيذية, و من الطبيعى ان يستقل القضاء عن الحكومة بل و من غير الطبيعى ان يظل القضاء تابعا للحكومة و لأوامرها, كيف ننتظر انتخابات صحيحة من جهات غير مستقلة , و عليه فمن الواجب على الحكومة برئاسة الدكتور عصام شرف الذى اثنى كثيرا على الثورة و الثوار و كذلك يجب على المجلس العسكرى الذى اكد مرارا و تكرارا على ان الانتخابات القادمة ستكون نزيهه , ان يساندا استقلال السلطة القضائية فى مصر من اجل حماية هذا الكيان من التبعية الحكومية التى قد تملى اوامرها على القضاء.

لماذا يحاكم الناشطون عسكريا ؟؟

فى نفس الوقت الذى يحاكم فيه اعتى الفاسدين فى النظام السابق فى محاكمات مدنية , يتعرض الناشطون للمحاكمات العسكرية , وهنا يظهر انحياز المجلس العسكرى للنظام القديم و النظام القديم ليس مبارك و اعوانه , لكن النظام القديم هو فكر قائم لا يقبل التجديد و لا التغيير, قد يبدو غريبا للمجلس العسكرى , ان يطالب احد الناشطين بالكشف عن ميزانية وزارة الدفاع و عن رواتب اعضاء المجلس العسكرى, و من وجهة نظر الناشطين انه من حق المصريين معرفة كل شىء عن اموال الدولة و لمن يتم دفعها و ان كان يستحقها ام لا, كذلك يرى الناشط السياسى انه من حقه انتقاد المجلس العسكرى بصفته السياسية كرئيسا للبلاد و بالطبع يستنكر المجلس العسكرى اغلب الانتقادات باعتباره حامى الثورة الاول و الاخير , و ان كان غريبا بعض الشىء ان يقوم حامى الثورة بالقبض على كل من  كان ينادى بالثورة , و الامثلة كثر الا ان كل الناشطين مصريين مدنيين و لا يحق للمجلس العسكرى محاكمتهم عسكريا بأى حال من الاحوال .

و الغريب فى الامر ان  تكرار محاكمة المدنيين لن يفيد المجلس العسكرى بالعكس سيضيف مزيدا من الضغط على الناشطين  قد يولد ثورة جديدة, و ليس بمستبعد قيام الثورة من جديد فكثير من الاحوال القائمة لم تتغير , مظاهرات عمال المصانع مستمرة و خاصة مصانع النسيج المنهكة من قبل المستثمرين الفاسدين , كذلك اسعار السلع فى زيادة مستمرة , فيجب الا يراهن المجلس العسكرى على  الشعب الذى يصبر و ينتظر املا فى مصر جديدة و لن يرضى بمصر المخلوع مرة اخرى .

و ان كثرت مظاهرات اتباع المخلوع فلن تعود مصر للوراء , لأن الشعب قد استيقظ من سباته و لن يعود مرة اخرى للنوم على كوابيس الفساد و الرشوة و المحسوبية و الظلم الاجتماعى الذى مازال قائما حتى اللحظة .

و هنا اعود للمحاكمات العسكرية للمدنيين و التى يقابلها محاكمات مدنية لعسكريين امثال مبارك , هذة المفارقة التى تؤكد مفهوم الانحياز للنظام السابق و ان كان كل ماسبق ليس صحيحا فليثبت المجلس العسكرى العكس .

يا مرشحو الرئاسة .... هل تدركون ؟

هل تدركون ان الغمامة قد انزاحت عن اعين الشعب المصرى, انكشف المستور , و لن يستطيع السكوت عن اى فساد قد يأكل قلب الوطن مرة اخرى , لن تنطلى عليه الخطب الرنانة او الكلمات اللامعة , الشعب المصرى قد بدأ لعب دور المراقب ان لم تكونوا تعلمون .

البعض منكم يتحدث عن العدالة , و البعض الاخر قد يذهب الى ميدان التحرير ,  تتحدثون عما يجب ان تفعله الحكومة و المجلس العسكرى , بالله عليكم تحدثوا عن انفسكم , عن احلام هذا الشعب الذى ينتظر تحقيقها على ايديكم؟  , اخبرونا كيف ستغيرون وجه هذا الوطن الى الافضل ؟ , كيف ستحققون العدالة , كيف سترفعون هامة الشعب المصرى الى الاعلى ؟

 من فضلكم , ضعوا بسطاء و فقراء هذا الشعب فى اعلى قوائم إهتماماتكم , إنهم من غنوا اخترناه و بايعناه و هم ايضاً من غنوا و خلعناه , هم من ضحوا بكل شىء من أجل الوطن , و لا يمكن نسيان دورهم العظيم فى الثورة فى التصدى للامن المركزى على كوبرى قصرالنيل يوم جمعة الغضب ,  و هم ايضاً  من دافعوا عنا يوم موقعة الجمل ,هم من يستطيعون الصعود بكم للقمة او السقوط  بكم للهاوية فلا تفكروا  لحظة بأن تنسوهم .

تجنبوا البرامج الانتخابية الهلامية , لن تنفع , لقد افاق هذا الشعب و لن ينام ثانية  على احلام  الوعود الزائفة , الشعب يريد برامج انتخابية محددة و واضحة , خطط بأوقات معلومة و ميزانيات شفافة , لأن المصريين قد شبوا عن الطوق و لن يعودوا صغاراً ابداً , لن يسكتوا عن عدم فهم او قلة وعى بل سيطالبون بالمزيد من الحرية  دوماً , سيسأل الشعب المصرى عن كل صغيرة و كبيرة فى هذا الوطن , عن دخل قناة السويس  و د خل السياحة و دخل التصدير و من يحتكر التصدير فى مصر و لما يحتكره , سيسأل عن شركات الاسمنت المصرية و أين ذهبت , عن الحديد الذى مازال محتكرا من قبل مسجون فى سجن طرة و من منكم لا يعرف احمد عز , سيبحث عن مصير المعونات الخليجية و الامريكية و لمن تذهب و على اى شىء تصرف , سيسأل عن رواتب المسئولين و على اى شىء يتقاضونها , سيسألكم لماذا تريدون ان تحكموا هذا البلد الشامخ .

هل ترون فى انفسكم خيرا لهذا البلد ؟ , هل صارحتم انفسكم بهذا السؤال من  قبل ؟ , لابد أن تفكروا فى الاجابة عن هذا السؤال  .

حاشدة حاشدة

انا كنت سعيدة امبارح بدرجة ماتتوصفش , خصوصا لما صليت فى الميدان الجمعة ولأول مره فى حياتى اصلى وراء الشيخ محمد جبريل و ياسلام على احساسى و هو بيدعى على كل فاسد فى مصر و الناس تأمن, والله بحق دعاء امبارح ربنا مش هيسيبنا, و ربنا رحمنا امبارح من الشمس بنسمات هوا و مطر مش فى التحرير بس لكن فى مصر كلها عشان احنا شعب غلبان و ربنا بيحبنا.

و بعدين كفاية ان كل محافظات مصر شاركت دا كمان فرحنى جدا جدا و كانت حشود فى التحرير و اسكندرية على الرغم من تصريحات الاخوان المعيبة و غيرهم بتكفير من يخرج لجمعة الغضب , احب اقول انى هشارك فى كل جمعة غضب لحد ما ميزان العدالة فى مصر يتعدل, انا و كل مصرى بيحب مصر.

الى المجلس العسكرى للقوات المسلحة المصرية

احنا تعبنا , الشعب كله تعب, بس ناويين نكمل المشوار عشان مصر, ياترى هيكلة الاجور تهم المجلس العسكرى ؟ , ياترى عمال مصر يهموا المجلس العسكرى ؟ , و شباب مصر اللى معتقلين فى السجن الحربى مستقبلهم مهم عندكم ؟
انا حزينة بس عشان مصر ممكن اموت , و كتير زيى كلنا فدا مصر

جمعة المحليات و الثورة لم تكتمل بعد

لماذا نخرج يوم الجمعة , حد هيسألكم ليه ؟
 اولا مبارك صحته كويسة و مش بيتحاكم لية؟
لية احمد عز بيغلى سعر الحديد حتى و هو فى السجن , ازاى يبقى لسه محتكر السوق و هو فى السجن؟
لية العمال حقوقهم منهوبة خصوصا عمال النسيج و دى اهم صناعة فى مصر , متى يقف المجلس العسكرى فى صف العمال و ليس فى صف المستثمرين؟
ثانيا
لماذا يتم تعيين محافظين من امن الدولة , بأيادى ملوثة بدماء الشهداء؟
لماذا تستمر المجالس المحلية التى لعبت الدور الاكبر فى تزوير انتخابات 2010 ؟
لماذا يتم التعتيم على مرتبات الوزراء الحاليين و لا نعرف ذمتهم المالية؟
ثالثا
لماذا لم يتم الغاء قانون الطوارىء حتى الان و قد  كان من اول مطالب الثوار؟

و اذا وجدت اجابات مقنعة فلا تخرج يوم الجمعة , و ان لم تجد فيجب ان تخرج يوم الجمعة لتطالب بكل الاجوبة لما سبق.
و هنا اماكن الخروج من المساجد يوم الجمعة :

القاهرة :

مسجد مصطفى محمود بالمهندسين- مسجد النور وكنيسة السيدة العذراء والأنبا بيشوي بالعباسية- مسجد رابعة العدوية وكنيسة القديسة العذراء والقديس أثناسيوس بمدينة نصر- مسجد عمر مكرم بالتحرير- مسجد حسين صدقي ومسجد الأوقاف وكنيسة السيدة العذراء بالمعادى- مسجد المراغي بحلوان- مسجد الفتح برمسيس- مسجد الحصري بمدينة 6 أكتوبر- مسجد الحسين بمنطقة الأزهر- مسجد السلطان حسن و الرفاعي بالسيدة عائشة- مسجد الخز نداره بشبرا وكنيسة الأنبا أنطونيوس بشبرا وسيكون التجمع بعدها في ميدان التحرير.

 الاسكندرية :

مسجد القائد إبراهيم وكنيسة المرقسية بمحطة الرمل- مسجد شرق المدينة بالعصافرة
في ميدان سيدي جابر.

السويس :

مسجد الأربعين- مسجد الشهداء- مسجد سيد الغريب- مسجد السيد حمزة

المنيا :

من مسجد الفولي، وكنيسة السيدة العذراء.وفي محافظة أسيوط  مسجد السلطان الفرغل- مسجد خشبة- مسجد الهلالي.

سوهاج :

من مسجد العارف بالله السوهاجي.

محافظة الغردقة

من مسجد الناصر

محافظة بور سعيد

ومسجد السلام

محافظة الشرقية

كلاً من مسجد التوحيد ببلبيس، ومسجد كفر الحوت بفاقوس

الغربية :

 مسجد الأحمدي والسيد البدوي وكنيسة ماري جرجس بمحافظة الغربية

المنصورة :

 مسجد الموافي ومسجد المصطفى

الاسماعيلية :

مسجد أبو بكر الصديق

عيد العمال فى التحرير

اولا الشرطة العسكرية كانت رافضة الناس تمشى فى داخل  الميدان , و كان هناك الحزب الشيوعى و شايلين اعلام حمرا لما سألت مرسوم عليها ايه قالى عضو من الحزب دا مطرقة و سندان او منجل اللى الفلاح بيقطع بيه الزرع للتعبير عن العمال و الفلاحين و قعدت اهتف معاهم كنت فاكراهم حزب العمال الاشتراكيين المهم طلع حزب العمال الاشتراكى واقفين فى حتة تانية و رحت عشان اعرف مكان الحزب منهم,

و بعدين دخل اتحاد النقابات المستقل و مشيت معاهم و دخلوا الميدان و كان واحد بيهتف للعمال و لما وقفنا امام الشرطة العسكرية قعد يقول و العسكر حاكمينا حسيت ان العساكر عايزين يطحنونا ضرب بس احنا بالنهار و جه ظابط رتبه كدة و كلم الواد اللى بيهتف بذوق اصل النهار غير الليل و الطحن اللى بيبقى فى الليل .

بس المهم المظاهرات نجحت تقف داخل الميدان فى الاخر,

مين الراجل الجدع دا؟

انا كل ما اشوف الصورة دى احس الغضب من مبارك و بحس بالاعجاب  بالراجل دا و بحس بالفضول مين الشجاع اللى ماسك العلم و اتمنى اشوفه مع يسرى فودة فى اخر كلام, دا لو لسة عايش.

شم النسيم هشمه يعنى هشمه

ايوه هشم النسيم و كلت النهاردة البيض و الرنجة و الخس و بقول لمصر كلها كل سنة و انتم بالف خير يا اقباط و مسلمين مصر , و بقول لكل الشيوخ عيب اوى تختزل الاسلام فى انك تحرم الفسيخ ولا حلاوة المولد, امتى هنتكلم عن مشاكل الناس الحقيقية ونشوفلها حلول بدل ما نتكلم على اى حاجة و السلام , المهم انا لونت البيض و صورته و دى عادة مصرية قديمة و معنديش استعداد اغيرها و لو افتى الف شيخ.

انا بحب الجيش و الجيش بيحبنى

سؤال للمجلس العسكرى صحيح  اغلب الحرامية اللى سرقوا البلد اتحبسوا و فى انتظار المحاكمة بس المعتقلين فى السجون الحربية ايه نظامهم ارجو من القوات المسلحة و من قيادتها الحكيمة النظر لشباب النشطاء بعيون الاب الذى يخاف على اولاده من ضياع مستقبلهم فى سنوات السجن الحربى .

مصانع بلدنا

مبادرة مصانع بلدنا هى فكرة اتمنى أن  تتحقق و هى عبارة عن مبادرة شباب تحت مظلة حكومية  و انادى فيها لمشروع يجمع 2000 شاب و كل منهم يدفع 10,000 جنية و بالتالى سيتجمع حوالى 20,000,000 و هذا المبلغ يتم بناء مصنع و يشترط على من يساهم فى دفع النقود من الشباب ان يعمل فى نفس المصنع او احد اقاربه و بذلك نسهم فى تطوير البنية الصناعية فى مصر و القضاء على البطالة .
و بدلا من ان يدفع الشباب النقود للهجرة غير الشرعية و يموتون غرقا ندفع النقود فى بناء المصانع و تطوير مستقبل الشباب و مصر فى نفس الوقت.
و يمكن ان يحتذى بهذة المبادرة و بناء العديد من المصانع يساهم فيها الشباب و يحصلون على نسبة من الربح ايضا.

مشروع اسكان الثورة

يا شباب انا كل ماروح التحرير اقول لازم نعمل فى الميدان دا حاجة حلوة و جت على بالى فكرة كويسة زى ما اعتقد و قولولى انتم ايه رأيكم فيها يعنى لو الجمعة اللى جاية نتفق مع الائتلافات بتاعة الثورة و نوصل مشروع لمجلس الوزراء و المجلس العسكرى ان كل يوم جمعة لو اتجمع مليون واحد فى الميدان كل واحد يتبرع بجنية يبقى معانا مليون جنية و كل واحد يصور بطاقته و يديها للجنة شعبية للاسكان و يدفع جنية و تكون فى حماية الجيش و لما نجمع الفلوس نبنى المقار القديمة بتاعة الحزب الوطنى لو البرج السكنى عشر ادوار و كل دور اربع شقق يبقى حلينا ازمة 40 اسرة زى اسر الدويقة و غيرة يعنى مش عايزين بيوت تقع على مصريين تانى و لا عايزين صخور تموت مصريين تانى

و على فكرة المشروع دا هيحبب الناس فى الثورة زيادة و يخرم عيون الثورة المضادة و نساعد الحكومة فى موضوع الاسكان , و ياريت نعمم المشروع دا فى كل ميادين المحافظات اللى قامت فيها الثورة و كل جمعة نجمع و نبنى عمارات او مصانع تشغل عمالنا و لا الحوجة لمستثمرين يمصوا دمنا و دم عمالنا. 

عمال مصر و المستثمر الاجنبى

عمال غزل شبين الكوم و البالغ عددهم 3600 عامل  والمعتصمين بالشركة اعتراضا على الفصل التعسفى لعدد منهم بالاضافة لاهانتهم لدرجة الضرب, دا مثال بسيط لمستثمر هندى اشترى المصنع و بيذل المصريين فى مصر ,   و عمال غزل المحلة عاملين اعتصام على النقابة التى لا تمثلهم , حسب مركز الدراسات الاشتراكية فى مصر  تذكر اهم مشاكل العمال منها 500 الف عامل بعقود مؤقته و طبعا بيذلوهم على التعاقد المؤقت, لما يكون فى سنة 2009 كام احتاج 478 احتجاج عمالى و مازال لحد اليوم الاحتجاجات مستمرة, اكبر مشاكل العمال هى  انخفاض الاجور و رفض المستثمرين و اصحاب المصانع زيادة الاجور  و كذلك اهانة المستثمرين للمصريين فى بلدهم و دى اكتر حاجه تتضايق .
لازم لازم يكون في حد ادنى لاجور العمال لو الحكومة عايزة تحافظ على عجلة الانتاج ,  و اذا اتحجج اصحاب العمال بخسارة فى الارباح خلاص اعمل للعمال نسبة شهرية من الارباح عشان يشتغلوا اكتر و يخافوا على الشغل و لو مش عاجبهم المستثمرين خلاص الحكومة تدفع الشرط الجزائى للمستثمرين و تاخد هى ارباح الشركات او  العمال يساهموا بنسبة صغيرة فى ثمن الشركات و يكون ليهم نسبة فى الربح .

ماهو مش ممكن مصر تتقدم الا اذا حافظت الحكومة على حقوق العمال اذا كانوا خايفين على عجلة الانتاج لازم يعرفوا ان عمال مصر هما تروس العجلة دى و عمرها ما هتمشى من غيرهم .
و بدل ما التليفزيون المصرى يعرض فيلم الايدى الناعمة فى عيد العمال اول مايو ما نعمل حاجة اكتر واقعية و تفرح كل عمال مصر , اذا كنتوا عايزين مستثمرين يبقى لابد من قوانين تنظم العلاقة بين العمال و المستثمرين و ان لم تطبق القوانين يبقى ملهاش لازمة استثمار فى المصانع و يفضلوا يذلوا فى العمال يعنى حرام تبقى بلدنا و الاجانب يذلونا فيها.

ازمة الغاز فى مصر و تصدير الغاز المصرى لاسرائيل!!!

انا نفسى مصر تكون احسن بلاد العالم و اللى حصل فى التحرير الجمعة اللى فاتت من اعداد كبيرة لسه بتنادى بالحرية مطمنى و ان شاء اللة الجمعة اللى جاية تكون احسن. و لو ان فيه حاجات كتير بتحرق الدم زى ازمة انابيب الغاز فى نفس الوقت اللى احنا بنضخ فيه غاز لاسرائيل واسرائيل بتحاربنا فى اثيوبيا و تضخ اسثماراتها هناك, طب ليه يعنى احنا بنعمل فى نفسنا كدة ليه دا اسرائيل لو تطول تمحى مصر من الخريطة كانت عملتها طب احنا نديها غاز لية عشان شرط جزائى فى العقد ندفعه و انا مستعدة اكون اول متبرعه فى دفع الشرط الجزائى .
الجمعة اللى فاتت كان فيه شباب كتير بيعطونى ورق فيه مطالب الناس من محاكمة مبارك و الثلاثى و حل الحزب الوطنى و غيره بس احلى ورقه قريتها كانت على الاخوان المسلمين و كان صاحبها بيتكلم عن خطورة وصول الاخوان للحكم و  الغريب انى مش خايفة من الاخوان خالص لان اغلب الشعب المصرى بيعرف من اللى هيسانده و مين اللى مش هيسانده و رغم اختلافى مع الاخوان لكن ليهم الحق فى المشاركة فى السياسية و عليه لازم يكونوا فى الصورة و امرنا لله.

الجمعة اللى فاتت كانوا الاخوان مشغولين بيوم اليتيم !!!! بس خلاص هم هيشاركو الجمعة اللى جاية.
اوعوا تكونوا توهتوا منى اهم شىء فى المطالب وقف تصدير الغاز لاسرائيل , ما هو يعنى  ماينفعش الناس تقتل بعضها على انابيب الغاز و نصدر لاسرائيل و اذا كان على الشرط الجزائى الشعب المصرى يتبرع و يدفعه و نخلص.